07/03/18: Azzioni "Pà u sempri" à a Prifittura d'Aiacciu (artìcula).

17/03/18: Azzioni "Pà u sempri" à a Prifittura d'Aiacciu (artìcula).

 corsematin web

17/03/18: Azzioni "Pà u sempri" à a Prifittura d'Aiacciu.

CUNFARENZA DI STAMPA

17/03/18

Cullittivu « PARLEMU CORSU ! »

Missagiu à u Statu Francesu

è à l’iletti corsi chì sò à nantu à pusizioni arcàichi

Macron hè « contru à a Cuufficialità »

Ma pà u « Bislinguìsimu »...

Chì voli dì bislinguìsimu in a so bocca ?

Bislinguìsimu = senta u corsu in carrughju à paru cù u francesu : senza cuufficialità ùn si farà…

Intantu hè vera chì ancu senza a Cuufficialità si poni fà affari par prumova l’usu di u corsu (è appruntà a Cuufficialità).

In l’iducazioni :

-        Giniralizà l’usu di u corsu da a 6a à a Tarminali (si ni finisci cù u corsu uzziunali : tutti i sculari avarani 3 ori di corsu ).

-        Metta in piazza una furmazioni pà i prufissori di i filieri bislingui di i cullegia è licea (è al di là pà tutti i parsunali di ‘ssi stabilimenta).

-        Accumpagnà cù inirgìa a missa in piazza di i scoli materni immirsivi spirimintali (accittati sottu à l’anzianu guvernu).

-        Chì u Statu si dessi i meza di tena i so ingagiamenta presi in u quatru di u Pianu (Statu/Rigioni) 2020 (tutti i scoli materni bislingui ; 40 % di i pruffissori di u sicundariu abilitati…).

-        lacà à i prufissori corsi diplumati da pocu a pussibilità di stà drentu à l’ìsula (è à più forti raghjoni par quiddi abilitati).

In u restu di a sucità :

-        Parchì micca cuntribuì à a criazioni di Centra d’Immirsisoni pà i maiori (a dumanda ci hè ; manchemu di furmatori…).

-        Chì u Statu arristessi di dà falzi argumenta ghjurìdichi par impidì a prugrissioni di u corsu in a sucità (lachendu ricutà par cursufunia, lachendu fà dilibarazioni in corsu in i cullittività, pirmittendu una cundiziunalità di l’aiutu liata à l’usu di u corsu drentu à i impresi…).

Affari si poni fà… è puri u Statu faci tuttu u cuntrariu :

U STATU CI VOLI FÀ RINCULÀ !

Ricusu di giniralizà u corsu in u primariu

purtantu privista dipoi 2011 sottu à a mandatura di manca

è cunfirmata in u Pianu 2020 !

Diminuì i filieri bislingui di u sicundariu

aggruppènduli drentu à stabilimenta !

U missagiu di sarratura à l’iletti corsi intornu à a lingua !

U incuragimentu di i paroli arcàichi di certi iletti di dritta

circhendu di renda cunflittuali (com’è 20 anni fà) u sughjettu di a lingua !

Mai accittaremu di rinculà

Mai accittaremu d’ùn avanzà !

ÙN GLURIFICHEMU QUIDDI CHÌ NÈGANI L’IDANTITÀ CORSA

PÀ U SEMPRI MANTINIMU A LINGUA CORSA È FÈMULA CAMPÀ !

14/03/18: Cunfarenza FFRAAC - PC! - CdC

  14/03/18 : UNA CÀRTULA SPICÌFICA PÀ I FIERI CRIATA DA "PARLEMU CORSU !"

 

‘Ssu màrcuri 14/03/18 emu participatu à una Cunfarenza : Cullittivu « Parlemu CORSU ! » - Cullittività di Còrsica – Fidirazioni di i fieri FFRAAC

« Parlemu Corsu ! » hà ilaburatu una càrtula spicìfica pà i fieri.

Hè u risultatu di a so spirienza à nantu à i campa di fieri è più particularamenti hè u risultatu di u travaddu fattu cù a fiera d’Aregnu in u 2016. À a so dumanda emu imaginatu comu cursizà u più pussìbuli u duminiu di a fiera… Attella in corsu, ghjocu cù u pùblicu, cunfarenzi cù traduttori, animazioni à u micrò… U ritornu di i spirienzi è a cuncirtazioni cù a FFRAAC hà cunduttu hà ilaburà una càrtula in 14 punta.

Ani signatu i Fieri è a CdC : i fieri pìddani u ingagiamentu di rispittà i punta di a càrtula è a CdC pidda u ingagiamentu d’aiutà i fieri (aiutu finanziaru è tècnicu).

« Parlemu Corsu ! » era l’iniziatori… Vighjaremu à u rispettu di i iingagiamenta rispittivi…

Ci era Saveriu Luciani pà a CdC è i rispunsèvuli di a Dirizzioni di a lingua.

Ci era Joelle Titran Suzzoni, a prisidenti di a FFRAAC ma dinò i prisidenti di parechji fieri (Venacu, Aregnu…). I membra di « Parlemu Corsu ! » èrani 10.

Eccu i 14 punta di a CÀRTULA SPICÌFICA PÀ I FIERI :

1. di rispittà a pulinumìa, veni à dì chì à u scrittu s’impiega a variità dialittali di u locu è à l’urali devi essa una piurità.

2. di fà l’affissu unicamenti in corsu.

3. di fà un prugrammu bislinguu (cù u scrittu in corsu più visìbuli chè quiddu in francesu).

4. di fà intarvinzioni in corsu à l’apartura di a fiera.

5. di fà u dibàttitu intornu à a timàtica di a fiera in lingua corsa, mittendu traduttori à dispusizioni (da u corsu à u francesu) par ùn lacà da cantu quiddu ch’ùn capisci micca.

6. di rializà una signalètica in corsu (lista à difinì).

7. di fà rializà intarvinzioni in corsu da l’animatori à u micrò.

8. di metta in piazza una furmazioni par pirmetta à i binivulanti è urganizatori di riceva unu insignamentu à nantu à a lingua corsa.

9. di fà rializà u più pussìbuli d’attella in corsu (prisintazioni di lipra, di ricetti di cucina…).

10. di distribuì scritti in corsu par fà unu riassuntu di i diffarenti attella è cussì lacanni una traccia.

11. di dumandà à l’artigiani d’illustrà u so bancu cù una signalètica spicìfia in lingua corsa.

12. di dumandà à u parsunali di a fiera di fà usu u più pussìbuli di u corsu.

13. di fà una animazioni in corsu chì faci participà u pùblicu cù i cummircianti, à u scrittu è à l’urali, cù un parsunali ricuttatu à posta par ‘ssu affari.

14. di fà animazioni in corsu pà i ziteddi (pocu importa u ghjocu, ciò chì conta hè chì l’animatori ùn parlèssini chè corsu).

19/02/18: Risposti fatti à i dumandi di l’Assamblea di a Ghjuvantù.

- Quelles sont vos idées afin de faire revivre la langue corse ?

L’idei ùn màncani. Ci n’hè chì sò basati à nantu à rivindicazioni è d’altri chì cèrcani suluzioni cù u pocu di meza ch’è no avemu avà. 

Quand’è no ci semu criati, 11 anni fà in u 2007, avìami 16 rivindicazioni piddendu appoghju à nantu à unu statutu di cuufficialità. Dipoi l’emu arricchiti è sò oramai 32. L’emu cuminicati di sittembri 2017 à a cumissioni di l’Assamblea incaricata di a lingua. Al di là di l’aspettu simbòlicu è valurizanti pà a lingua, dumandemu unu statutu parchì pò essa u strumentu ghjurìdicu chì ci pò pirmetta di sviluppà una pulìtica particularamenti ambiziosa pà a lingua. Dipoi u principiu a dimu : ci voli una Cuufficialità cù un cuntinutu ! I misuri pruposti tòccani numarosi duminia : a scola, a furmazioni, a signalètica, i cuncorsa, i media, l’attività culturali, a tupunimìa… piddendu in contu l’abitanti di l’ìsula, i corsi di fora, quiddi chì travàddani o quiddi senza travaddu. Intantu ci hè dui misuri ch’è no ghjudichemu primurdiali è chì illùstrani bè a nicissità d’unu statutu : immirsioni tutali à a scola primaria par isbuccà à nantu à un veru bislinguìsimu in u sicundariu è furmazioni ubligatoriu drentu à tutti i impresi isulani (da nutà chì ‘ssa misura ùn hè mancu à pena vista com’è custringhjanti da l’aienti in carrughju ; sò bramosi d’imparà u corsu ma ùn la si sèntini di riceva una furmazioni dopu à u travaddu ; tandu di ricèvala sopra à locu hè par eddi una uppurtunità). 

- À votre avis quel est l'avenir de cette langue ?

A lingua corsa ùn hà arristatu di perda lucutori dipoi guasgi 100 anni. Intantu dipoi pocu si risenti una pìccula crèscita ind’è i ghjòvani da 20 à 30 anni. A lingua uccupa spazia novi com’è a scola, i media, a littaratura, in l’affissera di cullittività lucali, à nantu à certi prudutta cumirciali… Po dipoi a presa di puderi da i naziunalisti chì si rivindichèghjani com’è difindidori di a lingua, si senti una dinàmica nova, matirializata frà altru da i scrizzioni impurtanti à i furmazioni a sera. Sò dicini d’aienti chì à nantu à tuttu u tarritoriu vòlini imparà u corsu. Manchemu ancu di furmatori talmenti a dumanda hè forti ! Dunqua, ci sò raghjoni d’essa inchieti parchì sparìscini l’anziani cù tutti i so cunniscenzi è parchì manchemu di meza, sopra à tuttu par riescia à intigrà tutti l’anni 5000 parsoni chì ghjùnghjini. A lingua corsa pò custituì un veru cimentu trà tutti l’abitanti di l’ìsula qualsìasi i so rurìcini ; ma ci voli à pudè falla… È, à tempu ci sò raghjoni di spirà, vistu ch’intornu à l’usu di a lingua ci hè una riali dinàmica in ‘ssu mumentu. Voli dì simpliciamenti chì ci voli à cuntinuà à bàttasi !

- Étant donné que Macron refuse la co-officialité mais est favorable au bilinguisme, qu'en pensez-vous ?

Chì voli dì « bislinguìsimu » in a so bocca ? Senza un cumplimentu d’infurmazioni ùn hà tantu sensu… S’eddu parla di bislingìsimu giniralizatu à a scola allora pò essa una avanzata. D’altrondi, senza parlà di bislinguìsimu, si pudarìa dighjà giniralizà a imparera di u corsu da u primariu à a fin’ di u sicundariu senza à avè bisognu di rifurmà a custituzioni… Otantu vulìa parlà di bislinguìsimu in a sucità, ma tandu senza meza cunsidarèvuli chì solu pò offra unu statutu, comu ghjùnghjaci ?... Di prima abordu, i so paroli pàrini essa rivilatrici d’una pustura ipòcrita…

- Est-ce que ce serait quand même un bon pas en avant et un avenir pour la langue Corse ?

Hè diffìciuli di sapè ciò chì ‘ssu guvernu voli fà. Par avà i presi di paroli di Macron sò piuttosti inchiitanti è làcani pinsà ch’eddu hè ancu prontu à facci rinculà. Intantu pudarìa à u cuntrariu dà calcusedda in più… Tandu, tuttu ciò chì hè un passu in davanti sarà bonu à piddà, ancu u mìnimu.

- À notre échelle (citoyens, corses) que pouvons-nous chacun de nous faire afin de faire en sorte qu'elle ne meurt pas ?

Ci sò l’azzioni cuncreti è sempri a rivindazioni da purtà ancu nanzi d’uttena a cuufficialità. Sò parechji l’afffari chì si pudarìani sviluppà senza cuufficialità. L’emu ditta in parechji uccasioni : pà l’iducazioni in Cumissioni Accadèmica (di maghju 2016), cù u cunsiglieri di a ministra (di luddu 2016), cù a Dirizzioni di a lingua corsa (di fruvaghju 2017) ; pà a sucità (di fruvaghju 2017) sempri cù a Dirizzioni di a lingua corsa. Pà l’iducazioni si tratta di furmazioni, di scoli immirsivi spirimintali, d’abilitazioni in dui anni… Pà a sucità si tratta sempri di furmazioni è dinò d’affissera, di presi di paroli, di signalètica, di dizziunariu in ligna, di sustenu à l’iniziativi privati… Quì semu sempri in a rivindicazioni parchì spiremu chì ‘ssi dumandi sbuccarani à nantu à una pulìtica di l’astituzioni. Intantu, u citadinu in carrughju pò agiscia ancu eddu senza à avè bisognu d’aspittà chì i misuri sìghini ubligatorii. Tutti i parenti pudarìani scriva d’uffiziu i so ziteddi à i corsi di corsu ; i cumercia pudarìani ficcà u corsu in inghji locu senza à avè bisognu d’essa sullicitati ; tutti quiddi chì t’ani a cunniscenza ch’eddi circhèssini à pruducia ancu chè calcusedda (arrigistramenta à nantu à internet, publicazioni d’un lipruchju…), ch’ùn ci hè bisognu d’essa un sapiintonu par falla (cù u tempu si farà una scelta sillittiva, par avà hè l’urgenza chì ci cumanda d’agì) ; ch’eddi s’addunìschini l’aienti par fà stondi com’è no facìami quand’è no ci semu criati : veni à dì risirvà un mumentu par parlà solu in corsu è cussì ritruvà pocu à pocu u riflessu d’aduprà u corsu in tutti i duminia è circunstenzi par quiddi chì u cunnòscini. Più si vidarà è più si sintarà u corsu è più quiddi ch’ùn l’ammaistrèghjani micca avarani a vodda di fà prugressa.

- Quels sont les futurs projets du collectif ?

Cù u Cullittivu cuntemu di fà di più in più azzioni rivindicativi à l’usu Green Peace par cuntinuà di fà sapè à u Statu ch’eddu và à l’incontru d’una vulintà pupulara è ch’un ghjornu o l’altru sarà tinutu di suddisfà i nosci rivindicazioni. Pà ciò chì hè di u tarrenu cuncretu cuntemu di fà un travaddu cù i media è unu cù i ghjòvani di l’ìsula. Riflittimu à comu sustena iniziativi privati à prò di l’immirsioni pà i chjuchi è pà i maiori… Emu privistu dinò d’intarvena par furmà l’aienti à u rispettu di a pulinumìa è vighjà à ciò ch’edda fussi da veru presa in contu da l’auturità.